யாழ்ப்பாணம் காரைநகரில் இரண்டு சிறுமிகள் பாலியல் வன்முறைக்கு ஆளானது உட்பட யாழ் குடாநாட்டில் இடம்பெற்று வருகின்ற பாலியல் வன்முறைகள் மற்றும் பாலியல் கொலைகளைக் கண்டித்தும், பாதிக்கப்பட்டவர்களுக்கு நீதி வழங்கப்பட வேண்டும் எனக் கோரியும் யாழ்ப்பாணத்தில் கவனயீர்ப்பு போராட்டம் ஒன்று நடத்தப்பட்டிருக்கின்றது.
இதற்கான அழைப்பை பெண்கள் செயற்பாட்டு வலையமைப்பு என்ற அமைப்பு விடுத்திருந்தது.
இந்த ஆர்ப்பாட்டம் குறித்து கருத்து வெளியிட்ட பெண்கள் செயற்பாட்டு வலையமைப்பின் யாழ் மாவட்ட இணைப்பாளர் ரஜனி சந்திரசேகரம், யாழ்ப்பாணத்தில் தொடர்ச்சியாகப் பல இடங்களிலும் பெண்கள் சிறுமிகள் மீது பாலியல் வன்புணர்வும், கொலைகளும் இடம்பெற்றிருக்கின்ற போதிலும், இதுவரையில் குற்றவாளிகள் உரிய முறையில் தண்டிக்கப்படவில்லை என சுட்டிக்காட்டினார்.
“பாதிக்கப்பட்டவர்களின் உறவினர்கள் அச்சுறுத்தப்படுகின்றார்கள். பாதிக்கப்பட்டவர்களுக்காகக் குரல் கொடுப்பவர்களும் அச்சுறுத்தப்படுகின்றார்கள். பெண்கள் மீதான வன்முறைகளுக்கு எதிராகக் குரல் கொடுப்பதென்பது சவால் மிகுந்ததாக இருக்கின்றது. இதன் காரணமாகவேகறுப்புப் பட்டியால் வாயை மூடிக்கட்டியபடி கவனயீர்ப்பு நடவடிக்கையில் ஈடுபட்டோம்” என அவர்தெரிவித்தார்.
“பெண்களுக்கு எதிரான வன்முறை குற்றச் சம்பவங்கள் இடம்பெற்றதும், காவல்துறையினர் விசாரணைகளை நடத்துகின்றார்கள். நீதிமன்றத்தில் வழக்குகள் பதிவு செய்யப்படுகின்றன. ஆயினும் குற்றவாளிகள் தப்பிச் செல்கின்ற போக்கும் பாதிக்கப்பட்டவர்கள் மேலும் பாதிக்கப்படுகின்ற நிலைமையுமே காணப்படுகின்றது” என்றும் அவர் கூறினார்.
யாழ் நீதிமன்றத்தின் எதிரில் கறுத்த பட்டியினால் வாய்களைக் கட்டியவாறு பெருமளவிலான பெண்கள் இந்த கவனயீர்ப்பு நடவடிக்கையில் கலந்து கொண்டிருந்தனர். -BBC
சிவில் நிர்வாகம் சரியாக செயல்படாத ஒரு நாட்டில் வல்லுறவு,வன்முறை சம்பவங்களும் ஒரு தொடர்கதைதான்.நீதிமன்ற செயல்முறைகளும் இதற்கு விதிவிலக்கா என்ன? எத்தனை துன்பங்கள்! எத்தனை கொடுமைகள்! ஈழத் தமிழச்சிக்கு? தமிழ் ஈழம் ஓன்று பிறக்காத வரையில் இந்த கொடுமைகள் அவர்களுக்கு ஒரு தொடர் கதைதான்.கதிர் காமத்து முருகா! எங்கள் ஈழத் தமிழச்சியை இந்தக் கொடுமையிலிருந்து காப்பாற்ற மாட்டாயா?