முக்தாமார் – அம்னோவுடன் “ஒற்றுமை அரசாங்கம்” என்பதே இல்லை என்று இன்று பாஸ் தலைவர் அப்துல் ஹாடி அவாங் உறுதியாக் கூறினார். பக்கத்தான் பங்காளிகள் அவர்களின் அரசியல் ஒப்பந்தத்திற்கு துரோகம் இழைக்க வேண்டாம் என்றும் அவர் கேட்டுக் கொண்டார்.

பாஸ் கட்சி அம்னோவுடன் இணந்து செயல்படும் என்று பேசப்படுவது கட்சியின் தோற்றத்தை கறைபடுத்துவதற்கான அவதூறுகளாகும் என்று இன்று பத்து பகாட்டில் கட்சியின் பேராளர்கள் கூட்டத்தில் கொள்கை உரையாற்றிய போது ஹாடி கூறினார்.

கடந்த காலங்களில் பல அரசியல் கட்சிகளுடன் கொண்டிருந்த ஒத்துழைப்புக்கு பாஸ் துரோகம் இழைத்ததே இல்லை என்றாரவர்.

“பாஸ்சின் போராட்ட வரலாற்றின் தொடக்கத்திலிருந்து, நாங்கள் நமது அரசியல் ஒத்துழைப்பு பங்காளிகளுக்கு துரோகம் இழைத்ததே இல்லை.

“ஆகவே, இந்த அரசியல் ஒத்துழைப்புக்கு துரோகம் இழைக்க வேண்டாம் என்று நாங்கள் நமது அரசியல் ஒத்துழைப்பு பங்காளிகளை கேட்டுக் கொள்கிறோம்”, என்று ஹாடி பலத்த ஆதரவுக் குரலோசைக்கிடையில் கூறினார்.

முக்கியமான முடிவுகள் அனைத்தும் ஒருமித்த இசைவின் அடிப்படையில் எடுக்கப்பட வேண்டும் என்பதை ஹாடி வலியுறுத்தினார்.