நாட்டில் பேசப்படும் பிற மொழிகளுக்கும் அதிக மரியாதை தர வேண்டும் என ஹிந்தி பேசும் மக்களுக்கு ஜனாதிபதி ராம்நாத் கோவிந்த் அறிவுரை வழங்கி உள்ளார்.
டெல்லியில் நடைபெற்ற ‛ஹிந்தி திவஸ்’ எனும் நிகழ்ச்சியில் கலந்து கொண்ட ஜனாதிபதி ராம்நாத் கோவிந்த் பேசியதாவது,
இந்தியாவின் அலுவலக மொழியாக ஹிந்தி ஏற்றுக்கொள்ளப்பட்டு பல ஆண்டுகள் ஆன பிறகும் சில பகுதிகளில் ஹிந்திக்கு தொடர்ந்து எதிர்ப்பு இருந்து வருகிறது. நாட்டில் பேசப்படும் பிற மொழிகளுக்கும் அதிக மரியாதை தர வேண்டும் என்றும் அப்போதுதான் நாடு முழுவதும் ஹிந்தியை பிரபலமடைய செய்ய முடியும் என்றார்.
முன்னதாக, தமிழ்நாட்டில் நடைபெற்ற ஹிந்தி எதிர்ப்புப் போராட்டங்களை சுட்டிக்காட்டிய அவர், தங்கள் மீது ஹிந்தி திணிக்கப்படுவதாக சில மாநில மக்கள் நினைக்கின்றனர். அதனால் ஹிந்தி மொழி பேசும் மக்கள், பிராந்திய மொழிகளுக்கும் உரிய அங்கீகாரம் அளிக்க வேண்டும். தமிழர்களுக்கு வணக்கம் கூறியும், முஸ்லிம்களை ‛அதாப்’ என்றும், தெலுங்கு பேசுபவர்களை ‛காரு’ என்றும் மரியாதையாக அழைக்க வேண்டும்.
இவ்வாறு பிற மொழி பேசும் மக்களிடம் பேசும் போது, அவர்கள் மொழியில் உள்ள சில வார்த்தைகளை அறிந்து, அதை பயன்படுத்த வேண்டும். அனைத்து மொழிகளையும் சமமாக பாவித்து, மதிப்பளிக்க வேண்டும். பிற மொழி தழுவல்கள், கலாசாரத்தை ஏற்றுக் கொள்வதன் மூலம் நாட்டில் ஒற்றுமை ஏற்படும். இவ்வாறு அவர் கூறியுள்ளார்.
-nakkheeran.in
வடநாட்டுக்காரர் பிற மாநில மொழிகளைப் பற்றி என்றுமே கவலைப் பட்டதில்லை. இங்குள்ள வட நாட்டவரும் ஓரிரு தமிழ் சொற்கள் கற்று கொண்டு பேசுவதும் அவர்தம் வணிக இலாபத்திற்கே அன்றி தமிழர் பண்பாட்டைப் பேணுவதற்காக அல்ல.
நாம்தான் அறிந்தே வட நாட்டவர் பண்பாட்டைப் பேணுவதில் மிகவும் சிரத்தை எடுத்துக் கொள்கிறோம். அப்புறம் ஏன் இந்தி மொழி திணிப்பு தமிழர் மீது அதிகரிக்காது.
தாய் மொழி வேண்டுமென்று இங்கு நாம் ஆர்பரிப்பது போல் கூட தமிழ் நாட்டுத் தமிழர் இல்லை. அவர்களில் ஒரு சிறு பகுதியினர் இந்தி திணிப்புக்கு எதிராகக் குரல் கொடுத்தால் பெரும்பான்மையினர் இந்தி படித்தால் வானுலகம் ஏறலாம் என்று கனவு காண்கின்றனர்!
அங்கேயும் தமிழ் சோறு போடாது என்ற எண்ணம்தான் ஆங்கில வழி கற்றோர் மத்தியிலும் நடுத்தர மற்றும் மேல்வர்க்க வசதி படைத்தோரிடமும் மேலோங்கி நிற்கின்றது. இதுதான் தமிழ் நாட்டின் நிலை. இது தமிழரின் சாபக் கேடு போலும்!
தமிழனுக்கு அடிமை புத்தி ரத்தத்தில் ஓடுகிறது. தமிழ் நாட்டில் தமிழுக்கு என்ன மதிப்பு இருக்கிறது? கடந்த ஆண்டு நான் விஜய் தொலைகாட்சி -நீயா நானா -என்ற நிகழ்ச்சியில் எப்படி தமிழ் பெயர்கள் நாறடிக்கப்பட்டது என்பதை பார்த்தால் புரியும். தமிழ் பெயர்கள் அவ்வளவு மட்டமாக மகிழ்ச்சிகரமாக நாறடிக்கப்பட்டது. திருமண நிகழ்ச்சிகளிலும் பிறந்தநாள் நிகழ்ச்சிகளிலும் எவனாவது தமிழை உபயோகித்து இருக்கிறானா? இல்லையே. நாம் எத்தனை மொழி வேண்டுமானாலும் கற்று கொள்வதில் தவறு ஏதும் இல்லை. ஆனால் தமிழ் நம் தாய் மொழி. அதற்க்கு முதன்மை கொடுப்பதற்கு எந்த காரணமும் தேவை இல்லை. அது சோறு போடுமா என்று கேட்பது தன் தாய் தன்னை பெற்றாளா என்று கேட்பதற்கு சமம். அதை விட ஈனத்தனம் வேறு ஒன்றும் இல்லை. தமிழ் நாட்டில் தனியார் இந்தி மொழி பள்ளிகள் இருப்பதில் தவறில்லை ஆனால் அரசு வழி இருக்கக்கூடாது. அப்படி இருந்தால் எல்லா அதிகாரத்துவ மொழிகளுக்கும் இருக்க வேண்டும். அங்கு தமிழ் மொழி வழக்கத்தில் இருந்தால் மதிக்கலாம் -அங்கு தமிழிங்கிலிஷ் அல்லவா நடைமுறை.