அரசியல் களத்தில் கமல்ஹாசன்: சாதிப்பாரா?


அரசியல் களத்தில் கமல்ஹாசன்: சாதிப்பாரா?

சுமார் இருபது – இருபத்தைந்து ஆண்டுகளுக்கு முன்பாக கமல்ஹாசன் ஒரு முன்னணி வார இதழுக்கு அளித்த பேட்டியில், நீங்கள் அரசியலுக்கு வருவீர்களா என்று கேள்வியெழுப்பப்பட்டது. அதற்குப் பதிலளித்த கமல்ஹாசன், நான் அரசியலுக்கு வந்தால் தவறு செய்பவர்களை எந்திரத் துப்பாக்கியால் சுட்டுவிடுவேன்; அதனால் அரசியலுக்கு வரமாட்டேன் என்று பதிலளித்தார்.

2017 நவம்பர் 7ஆம் தேதியன்று அவரது பிறந்த நாளில் செய்தியாளர்களை அவர் சந்தித்தபோது, உங்களுடன் இருப்பவர்கள் தவறுசெய்தால் என்ன செய்வீர்கள் என்ற கேள்விக்கு, என் படங்களில் தவறு செய்தவர்களை நான் என்ன செய்தேனோ அதைவிட கடுமையாக செய்ய வேண்டியிருக்கும் என்று பதிலளித்தார். ஆனால், ஒரே வித்தியாசம் அவர் தேர்தல் அரசியலில் அவர் நேரடியாக இறங்க முடிவெடுத்துவிட்டார் என்பதுதான்.

தமிழக திரைத் துறையிலிருந்து தமிழக அரசியலுக்கு வந்தவர்களின் பட்டியல் மிகப் பெரியது. அண்ணா, மு.கருணாநிதி ஆகியோர் சினிமாத் துறையில் செயல்பட்டவர்கள் என்றாலும் அவர்கள் சினிமா மூலம் கிடைத்த பிரபலத்தால் அரசியல் களத்தில் சாதித்தவர்கள் அல்ல. ஆனால், எம்.ஜி.ஆர்., ஜெயலலிதா, விஜயகாந்த் ஆகியோருக்கு அவர்களது சினிமா பிரபலம் மிக முக்கியமான முதலீடாக இருந்தது.

ஆனால், இவர்களுக்குக் கிடைத்த வெற்றி, இவர்களைப் பின்பற்றி சினிமாவிலிருந்து அரசியலுக்கு வந்த பலருக்குக் கிடைக்கவில்லை. எஸ்.எஸ். ராஜேந்திரன், சிவாஜி கணேசன், பாக்கியராஜ், டி. ராஜேந்தர் ஆகியோர் அரசியலில் பெரிய வெற்றியைப் பெறவில்லை. இதற்கிடையில், ராமராஜன், எஸ்.வி. சேகர், எஸ்.எஸ். சந்திரன், நெப்போலியன் உள்ளிட்ட அரசியலுக்கு வந்த நடிகர்கள் பலரும் தமிழக கட்சிகள் எதிலாவது ஒன்றில் இணைந்தே தேர்தலில் போட்டியிட்டனர்.

ஆனால், தொன்னூறுகளின் துவக்கத்திலிருந்து தமிழின் முன்னணி நடிகரான ரஜினிகாந்தின் அரசியல் பிரவேசம் குறித்து ஊடகங்களால் பரபரப்பாக விவாதிக்கப்பட்டது. அப்போதைய தமிழக முதல்வரான ஜெ. ஜெயலலிதாவை சில சந்தர்ப்பங்களில் அவர் கடுமையாக விமர்சித்ததே இந்த யூகங்களுக்கான அடிப்படை.

1996ல் வெளிப்படையாக தி.மு.க. – த.மா.காங்கிரஸ் கூட்டணியை அவர் ஆதரித்தார். 2004ல் வெளிப்படையாக பாட்டாளி மக்கள் கட்சிக்கு வாக்களிக்க வேண்டாம் என்று குறிப்பிட்டார். இந்த சந்தர்ப்பங்களைத் தவிர, அவர் அரசியல் குறித்து வெளிப்படையாக பேசிய தருணங்கள் மிகவும் குறைவு.

இருந்தபோதும் கடந்த சுமார் இருபத்தைந்து ஆண்டுகளாக தொடர்ந்து அவரது அரசியல் பிரவேசம் குறித்து பேசப்பட்டும் விவாதிக்கப்பட்டும் வருகிறது. 2016ஆம் ஆண்டின் இறுதியில் அவரது பிறந்தநாளையொட்டி ரசிகர்களைச் சந்தித்தபோது மீண்டும் ரஜினி அரசியலுக்கு வருவாரா என்ற கேள்வியெழுந்தது. ரசிகர்கள் சந்திப்பில் அவர் பேசும்போது, போர் வரும்போது களத்தில் இறங்க வேண்டும் என்று மட்டும் சொன்னார்.

-BBC_Tamil

SHARE THIS STORY :    

RELATED POSTS

No related posts found!

   

உங்கள் கருத்துகளை பதிவுசெய்யுங்கள் (Share Your Comments)

விதிமுறைகள்: கருத்து ஆபாசமானதாக, அருவருக்கத்தக்கதாக, பிறரை அல்லது பிறரது சமயத்தை, சமூகத்தை இழிவுபடுத்துவதாக இருக்கக்கூடாது. அவ்வாறான கருத்துகள் அனுமதிக்கப்படாது. கருத்து சுருக்கமாகவும் பொறுப்புடனும் தெரிவிக்கப்பட வேண்டும். நீங்கள் பதிவு செய்யும் கருத்துக்கு நீங்களே முழு பொறுப்பாளி.

  • Shanthan wrote on 14 நவம்பர், 2017, 12:33

    செவாலியர் டாக்டர் பத்மபூஷண் கமல்ஹாசனின் மனித நேய செயல்களின் ஒரு துளிகள்..
    1981 ராஜபார்வையின் முதல் காட்சி வசூல் ஒரு லட்சத்தை கண் பார்வையற்றவர்களுக்குத் தந்தார்!
    1983 இலங்கை தமிழர்களுக்கு ஆதரவாக சென்னையில் ஊர்வலம் நடத்திய முதல் கலைஞானி கமல்ஹாசன்!
    1985 கோவையில் மாநாடு நடத்தி பல நலத்திட்டங்கள் புரிந்தார்!
    1988 போதை ஒழிப்பு மறுவாழ்வு மையத்திற்கு சூரசம்ஹாரத்தின் முதல் காட்சி ஐந்து லட்சம் வசூலை கொடையாக அளித்தார்!
    1989 கமல்ஹாசன் நற்பணி இயக்கமாக தன் ரசிகர் நற்பணி மன்றங்களை மாற்றினார். இதுவரை பதினைந்தாயிரம் ஜோடி விழிகள் தானமாக கொடுக்கப்பட்டுள்ளது. தமிழகத்தின் முக்கிய ரத்த வங்கிகளில் இந்த இயக்கமும் இடம்பெறும்.
    இது வரை ரசிகர்கள் மூலம் மட்டும் செய்த நற்பணிகள் இருபது கோடியை தாண்டியுள்ளது.
    1989 மருஷியஸ் நாட்டில் நடந்த உலக தமிழ் மாநாட்டில் கலந்து கொண்ட அரசியல் சாராத முதல் தமிழ் கலைஞன் கமல்ஹாசன். தமிழையும் தமிழர்களையும் என்றும் அவர் விட்டு கொடுத்ததில்லை
    1992 06/12/1992 பாபர் மசூதி இடித்ததை கண்டித்து பாராளுமன்றத்திற்கு ஒலிநாடா அனுப்பிய முதல் இந்தியனும் தமிழனும் செவாலியர் கமல்ஹாசன் மட்டுமே!
    1994 தனம் என்னும் தாழ்த்தப்பட்ட சிறுமி சாதிய கொடுமைகளுக்கு ஆளாகிய போது அவரை நேரில் பார்த்து ஆறுதல் தெரிவித்து உதவி புரிந்தார்!
    1996 பரமக்குடி நகராட்சி உயர் நிலைப் பள்ளியின் கட்டிடத்தை புதுப்பிக்க பத்து லட்சம் உதவினார்!
    1997 சென்னையில் முதன் முதலில் பிறந்த நீல வண்ண குழந்தையை மருத்துவமனையில் சந்தித்து உதவி புரிந்தார்! !
    1998 தென் இந்திய திரைப்பட தொழிலாளர்களின் போராட்டத்திற்கு குரல் கொடுத்த ஒரே நடிகர் கமல்ஹாசன் மட்டுமே!
    2002 குடந்தை தீ விபத்தில் பலியான குழந்தை மலர்களுக்கு பனிரெண்டு லட்சம் வழங்கினார்!
    2002 உடல்தானம் செய்த முதல் கலைஞர் ஆனார்!
    2004 சுனாமியால் பாதிக்கப்பட்ட மக்களுக்காக இருபத்தியொரு லட்சம் உதவினார்!
    2011 புற்றுநோய் மற்றும் உயிர்கொல்லியால் பாதிக்கப்பட்ட குழந்தைகளுக்காக பெற்றால் தான் பிள்ளையா அமைப்பை நிறுவினார்! உயிர்க்கொல்லியால் பாதிக்கப்பட்ட குழந்தைகளுக்காக இலவசமாக விளம்பரங்களில் நடித்து கொடுத்தார்
    2014 தேர்தல் ஆணையத்திற்காக இலவசமாக அதன் விளம்பரத்தில் விழிப்புணர்வை ஏற்படுத்தினார்
    2015 போத்திஸ் நிறுவனத்தின் விளம்பரத்தில் நடித்து பதினாறு கொடிகளை புற்றுநோயால் பாதிக்கப்பட்ட குழந்தைகளுக்கு வழங்கினார்!
    தொடர்ந்து மக்கள் பிரச்சினைகளுக்காக குரல் கொடுத்துக்கொண்டிருக்கும் வீரத் தமிழன் கமல்ஹாசன் மட்டுமே.

  • en thaai thamizh wrote on 14 நவம்பர், 2017, 19:45

    அவரின் தொண்டு தொடரட்டும்–வாழ்த்துக்களும் பாராட்டுகளும். இவரைப்போல் மற்ற நடிகர்களும் ஒன்று சேர்ந்து வேலை வாய்ப்புக்கு தொழிற்சாலைகள் கட்டினால் இன்னும் சிறப்பாக இருக்கும். மக்களுக்கும் இலவச எண்ணம் வராது.

கருத்துகளை தமிழில் தட்டச்சு செய்ய முடியும். உதாரணம் : "amma" என்று டைப் செய்து SPACEBAR-ஐ அழுத்தினால் "அம்மா" என்று தோன்றும் (Press Ctrl+g to toggle between English and Tamil)

%d bloggers like this: