தமிழும் சைவமும் இரு கண்கள் – ந. தருமலிங்கம்

‘ஞாயிறு’ நக்கீரன்  –  சிவ நெறியான சைவ நெறியைப் பின்பற்றும் தமிழர்கள் தங்களின் தாய் மொழியான தமிழில்தான் பரம்பொருளை வழிபட வேண்டும். சிந்து சமவெளி நாகரிக சான்றின்படி ஆரியர் வருகைக்கு முற்பட்ட காலத்தில் இருந்தே ஆயிரக் கணக்கான ஆண்டுகளாக இமயம் முதல் குமரிவரை செழித்து துலங்கிய சைவ நெறியைப் போற்றி வழ்ந்த தமிழர்கள், தமிழையும் சைவத்தையும் தங்களின் இரு விழியெனக் கொண்டு வாழ்ந்த நிலை பத்தொன்பதாம் நூற்றாண்டு வரை நிடித்தது.

அந்த செம்மாந்த நிலை மீண்டும் துளிர்க்க வேண்டும் என்று  தலைநகரில் மலேசிய சைவ நற்பணிக் கழகத்தின் சார்பில் கொண்டாடப்பட்ட தமிழ்ப் புத்தாண்டு விழாவில் நிறைவுரை ஆற்றிய ‘சிவனெறி செம்மல்’ ந.தருமலிங்கம் முழங்கினார்.

அண்மைய ஆண்டுகளாக பொங்கல்-தமிழ்ப் புத்தாண்டு விழாவை எழுச்சியுடன் கொண்டாடி வரும் மலேசிய சைவ நற்பணிக் கழகம், இந்த ஆண்டு சற்று காலம் கடந்து விட்டதால் தமிழ்ப் புத்தாண்டு விழாவை மட்டும் வழக்கமான உற்சாகத்துடன், ஆன்மிக இறைநெறியும் தமிழிய சிந்தனையும் மிளிர பிப்ரவரித் திங்கள் 4-ஆம் நாள் ஞாயிற்றுக்கிழமை தலைநகரில் கொண்டாடியது.

திராவிட இனத்தினர் மொழி வழியாகப் பிரிந்து மலையாளம், தெலுங்கு, கன்னட மொழியினர் என தனித்தனி இனத்தினராக வாழும் இன்றைய சூழலில், தமிழர் மட்டும் திராவிடர் என்று சொல்லிக் கொண்டு தமிழிய சிந்தனையை முனை மழுங்கச் செய்வதும் தமிழர் என்று சொல்லிக் கொள்வோரைத் தாழ்வாகக் கருதுவதும் மாற வேண்டும்.

தமிழர்களுக்கு பாரம்பரிய சமய நெறி உண்டென்பது தொல்காப்பியர் காலத்தில் இருந்தே இலக்கியங்கள் நமக்கு எடுத்தியம்புகின்றன. குறிஞ்சி, முல்லை, மருதம், நெய்தல், பாலை நிலங்களில் வாழ்ந்த தமிழ் மக்கள், தத்தம் வாழ்க்கைச் சுழலுக்கு ஏற்ப பரம்பொருளை வழிபட்டுள்ளனர். அந்த வகையில், மலையும் மலை சார்ந்த பகுதியுமான குறிஞ்சி நிலவாழ் மக்கள் முருகனையும் வள்ளியயையும் வழிபட்டனர்.

பிற்காலத்தில் தமிழரின் பண்பாட்டில் ஆரியக் கலப்பைப் புகுத்தியவர்கள் மலாய் மொழியில் ‘pendatang’  என்று வழங்கப்படும் வந்தேறிகளான பிராமணர்கள் ஆவர். இந்த வரலாற்று உண்மையை தமிழர்கள் ஏன் உணரவும் தெளியவும் மறுக்கின்றனர் என்று சைவ நற்பணிக் கழகத் தலைவருமான தருமலிங்கம் வினாத் தொடுத்தார்.

அதனால், முருகன் என்னும் தமிழ்க் கடவுள் சுப்பிரமணியன் ஆனதுடன், தெய்வானை என்ற பெண்ணை இரண்டாவது மனம் புரிந்ததாகச் சொல்லி, முருகனுக்கு பூனூலைப் போட்டு தமிழ்க் கடவுளை பிராமணக் கடவுளாக மாற்றினர். இவ்வாறு, தமிழ் வழிபாட்டையும் சிதைத்து புதிய சமயக் கூறுகளைப் புகுத்தி,  தமிழரின் உருவ  வழிபாட்டைவிட அக்னி வழிபாடும் வேள்வி வழிபாடும் உயர்ந்தது என்னும்  நிலையை ஏற்படுத்தினர். இதனால் பன்னிரண்டு திருமுறைகள், 14 மெய்கண்ட சாத்திரங்கள், சைவ புராணம் ஆகியன பின்தள்ளப்பட்டு ஆரிய முறையிலான நான்கு வேதங்கள், சமஸ்கிருத மந்திரம், வேள்வி முறை எல்லாம் இப்போது நம்மை சூழ்ந்துள்ளன.

தமிழ்க் கடவுளை தமிழில் வழிபடாமலும் தானே வணங்காமலும் இன்னொருவரை தஞ்சம் நாடி அவர் சம்ஸ்கிருதத்தில் தனக்காக ஓதுவதைக் கேட்டு ஒன்றும் புரியாமல் தலையாட்டிவிட்டு வரும் அவல நிலைக்கு இன்றைய சைவத் தமிழர்கள் ஆட்பட்டிருப்பது குறித்து தமிழர்கள் சிந்திப்பதில்லை.

சைவ நெறியில் பரிகாரத்திற்கும் தர்ப்பணத்திற்கும் இடம் இல்லவே இல்லை. அங்கிங்கினாதபடி எங்கெங்கும் நிறைந்திருக்கும் பரம்பொருளை வாழும் காலத்திலேயே திருமுறையால் துதித்து சிவனின் பாதம் பணியும் இறைநெறிப் பண்பைத் தொலைத்து விட்டு, உயிர் பிரிந்து வெற்று உடம்பாக மண்ணில் சரிந்திருக்கும்போது தனக்காக மற்றவர் திருமுறை ஓதுவதால் என்ன பயன் விளையப் போகிறது என்பதை சைவத் தமிழர்கள் இனியாவது சிந்திக்க வேண்டும்.

தமிழர்கள் தமிழ்ப் புத்தாண்டைக் கொண்டாடினால் மற்றவர்கள் ஏன் மல்லுக்கு நிற்கிறார்கள் என்று புரியவில்லை. தமிழரிடையே ஒற்றுமை குறைந்திருப்பது-தான் இதற்குக் காரணம் என்று சொன்ன தருமலிங்கம், பெரியவர்கள் தங்களின் பிள்ளைகளுக்கு தமிழ் மரபையும் சிவ நெறியையும் நம் பண்பாட்டையும் சிறு வயது முதலே சொல்லிக் கொடுக்க வேண்டும் என்று கேட்டுக் கொண்டார்.

கோலாலம்பூர் டான்ஸ்ரீ கே.ஆர்.சோமா மண்டகத்தில் ‘சிவநெறி செல்வி’ஆதிரை வழி நடத்திய இந்த விழாவில் ‘சிவநெறி செல்வியர்’ ஆரணியும் அம்மணியும் முன்னதாக திருமுறை ஓதினர். தொடர்ந்து ‘சிவநெறி செல்வர்’ ஜெ.ராஜ்குமார் திருமுறை இன்னிசை வழங்கினார். தொடர்ந்து ‘சிவநெறி செல்வி’ உமாதேவி ரகுராமன் திருக்குறள் சிந்தனையுடன் ஆன்மிக உரை நிகழ்த்தினார். செல்வி அமிர்தா பரத நடனமும் திருமதி அல்லி நாட்டுப் புற பாடலையும் வழங்கி அரங்கில் திரண்டிருந்தோரை உற்சாகப்படுத்தினர்.

நூற்றுக் கணக்கானோர் கலந்து கொண்ட இந்த தமிழிய – சைவ நிகழ்ச்சி மதிய உணவுடன் நிறைவு பெற்றது.

SHARE THIS STORY :    

RELATED POSTS

ID); $tagIDs = array(); if($tags){ $tagcount = count($tags);for($i = 0; $i < $tagcount; $i++){ $tagIDs[$i] = $tags[$i]->term_id; }$args = array( 'tag__in' => $tagIDs,'post__not_in' => array($post->ID), 'showposts'=>5, 'caller_get_posts'=>1); $my_query = new WP_Query($args); if( $my_query->have_posts() ){ while ($my_query->have_posts()) : $my_query->the_post(); ?>

No related posts found!

   

உங்கள் கருத்துகளை பதிவுசெய்யுங்கள் (Share Your Comments)

விதிமுறைகள்: கருத்து ஆபாசமானதாக, அருவருக்கத்தக்கதாக, பிறரை அல்லது பிறரது சமயத்தை, சமூகத்தை இழிவுபடுத்துவதாக இருக்கக்கூடாது. அவ்வாறான கருத்துகள் அனுமதிக்கப்படாது. கருத்து சுருக்கமாகவும் பொறுப்புடனும் தெரிவிக்கப்பட வேண்டும். நீங்கள் பதிவு செய்யும் கருத்துக்கு நீங்களே முழு பொறுப்பாளி.

  • தேனீ wrote on 5 பிப்ரவரி, 2018, 21:11

    #இந்த வரலாற்று உண்மையை தமிழர்கள் ஏன் உணரவும் தெளியவும் மறுக்கின்றனர் #

    பழக்க வழக்க குற்றமும் நம் சமயத்தை நாமே கற்றறிந்து கொள்ளாது வாழும் இழி நிலையுமே காரணமாகும்.

  • தேனீ wrote on 5 பிப்ரவரி, 2018, 21:18

    இந்துக்கள் படிக்காத மேதைகள்!

    பைபிள் படித்தவன் கிருஸ்த்துவன். குர்ஆன் படித்தவன் முஸ்லீம். எதுவும் படிக்காதவன் இந்து! எதுவும் படிக்காதவன் எப்படி இந்து ஆனான்?

    இந்து மதம் என்றாலே கோயில் கிரியைகளும் வீட்டுக் கிரியைகளும்தான் என்ற கருத்தே இந்துக்கள் அனைவரின் புத்தியிலும் எழுதப்பட்டிருக்கிறது. அந்தக் காலத்தில் கோயில் கிரியைகளை ஊர்ப் பெரியவர்களும் வீட்டுக் கிரியைகளை வீட்டுப் பெரியவர்களும் செய்தனர். இப்போது எல்லாக் கிரியைகளும் பிராமணர் கைகளுக்கும் பூணூல் போட்ட தமிழர் கைகளுக்கும் போய்விட்டதால் இந்துக்களுக்கு அவர்கள் சமயங்களோடு எந்த நேரடித் தொடர்பும் இல்லாமல் போய் விட்டது.

    திருமணம், பரிசம், சவ அடக்கம், கருமக் கிரியைகளும் ‘பேக்கேஜ் கம்பெனிகளுக்குப்’ போய்விட்டதால் பந்தல் போடுதல், அலங்காரம் செய்தல், கூடி நின்று விருந்து சமைத்தல் போன்ற வேலைகளும் இந்துக்களுக்கு இல்லை. மிச்சம் என்ன இருக்கிறது? ஒன்றும் இல்லை.

    நூலறிவு மட்டுமல்ல, காலங்காலமாய்ச் செய்து வந்த கிரியைகள் பற்றிய அறிவும் கூட இன்றைய இந்துக்களுக்கு இல்லை. கோயிலுக்குப் போய் அர்ச்சனை சீட்டு வாங்குதல், பவித்திரம் போட்டுக் கொண்டு யாகத்திற்கு முன்னாள் உட்காருதல், நெய்விளக்கு வாங்கிக் கொண்டு சுற்றி வருதல், நவக்கிரகங்களைப் பூசாரிகள் சொல்லும் எண்ணிக்கைப்படிச் சுற்றுதல் என்ற அளவோடு கோயில் கிரியைகள் முடிந்து போகும். ஒரு மூன்று மாதம் கோயில் பூசாரிகள் எல்லாரும் வேலை நிறுத்தம் செய்வார்களேயானால் இந்து சமயம் செயலற்று நிலைகுத்திப் போகும்.

    தியானம்:

    கோயில் கிரியைகளாலும் பரிகார யாகங்களாலும் சலித்துப் போன இந்துக்கள் குருமார்களின் இயக்கங்களுக்குப் படை எடுக்கின்றார்கள். பல இயக்கங்களுக்குத் தியானம்தான் முதலீடு. குருவின் படத்தைக் கடவுளுக்கு நிகராக வைத்து வழிபாடு செய்கின்றனர். குரு கேட்ட தொகையைக் கொடுத்துவிட்டு அவர் பெயரைச் சொல்லித் தியானம் செய்தால் நினைத்த காரியங்கள் அனைத்தும் நிறைவேறும் என்ற குருட்டு நம்பிக்கையில் காசுபணம் இழந்து மனநோயாளி ஆகி வாழ்க்கையை இழந்தவர் பலர்.

    கணவன் மனைவியை அண்ணன் தங்கையாக மாற்றித் துறவிகள் ஆக்கி அவர்கள் வாழ்க்கையையும் சொத்துக்களையும் பறிக்கும் தியான இயக்கங்கள் சில.

    இந்த அறியாமையைப் பற்றி இந்துக்கள் எவருக்கும் கவலை இல்லை. இந்து சமய இயக்கங்களுக்கும் கவலை இல்லை. கண்களை இறுகக் கட்டிக் கொண்டு இருட்டு அறையில் பஞ்சு மெத்தையில் படுத்துக் கொண்டு இந்துக்கள் எல்லாரும் ஞானசொரூபிகளாகத் திரிவது போல் கனவு காணுகிறார்கள் சமயத் தலைவர்களும் அவர்களின் தொண்டர்களும்.

    மதமாற்றம்:

    இவர்களைப் பார்த்துச் சிரித்தபடியே கிருஸ்த்துவர்களும் முஸ்லிம்களும் இந்துக்களைக் கூட்டம் கூட்டமாகக் கொள்ளையடிக்கிறார்கள்.

    படிக்காத மேதைகளாகிய இந்துக்கள் எல்லாரும் படித்த மேதைகளாக வேண்டும். ‘டாக்டர், என்ஜினியர், லாயர், அக்கவுண்டண்ட்’ என்ற படிப்பெல்லாம் இந்து சமயத்தையோ சைவ சமயத்தையோ கற்றுக் கொடுக்காது. அதையெல்லாம் படித்தவர்கள் இதையும் ஒரு திட்டமிட்ட கல்வியாகக் கற்க வேண்டும். அதற்கு ஐந்து வருடம் ஆவது போல் இதற்கும் ஐந்து வருடம் ஆகும்.

    எதைப் படிப்பது?

    இந்தியா ஒரு சமயத்தை உடைய நாடு அல்ல. நானூற்று இருபத்தைந்து மதங்கள் கொண்ட நாடு. இவற்றுள் ஷண்மதம் என்னும் ஆறு மதங்களில் தமிழ்நாட்டில் மட்டும் புழக்கத்தில் இருப்பவை. ஐந்து மதங்கள் சைவம், வைணவம், காணபத்தியம், கௌமாரம், சாக்தம் ஆகிய மதங்கள் ஒவ்வொன்றுக்கும் நூல்கள் உள்ளன. இவற்றுள்ளும் சைவ சமயம் இருபதெட்டு ஆகமங்கள், பன்னிரண்டு திருமுறைகள், பதினான்கு மெய்கண்ட சாத்திரங்களைக் கொண்ட முழுமையான பெருஞ்சமயமாக விளங்குகிறது.

    அறிவு சார் சிந்தனை

    ஆகமங்கள், திருமுறைகள், மெய்கண்ட சாத்திரங்கள் அனைத்தும் அறிவு சார் சிந்தனையாகிய சித்தாந்தம் என்னும் தத்துவத் துறையை அடித்தளமாகக் கொண்டவை. கடவுள், உயிர் மற்றும் ஆணவம், கன்மம், மாயை என்னும் மூவகை கட்டுகளையும் ஆகியவற்றைப் பற்றித் தெளிவான முடிவுகளையும் காட்டுவது சித்தாந்தம். உயிர்கள், உடல், உலகம், நுகர்ச்சிகள் பெற்றுப் பிறந்தும் இறந்தும் இறுதியில் முத்தி என்னும் நீங்காத இன்ப நிலை அடையும் என்பதைப் பகுத்தறிவின் அடிப்படையில் விவரிக்கின்றது சைவ சித்தாந்தமாகும்.

    ஏதாவது ஒன்றைச் சொல்லுங்கள் என்றால் தமிழில் அமைந்துள்ள திருமுறைகளைப் படியுங்கள் என்றே சொல்ல வேண்டும். திருமுறைகளிலும் நால்வர் திருமுறைகளாகிய முதல் எட்டுத் திருமுறைகளைப் படிக்க வேண்டும். எட்டுத் திருமுறைகள் எட்டாத திருமுறைகள் என்று திகைப்போர் எட்டாம் திருமுறையாகிய திருவாசகத்தையாவது படிக்க வேண்டும்.

    ‘புரியவில்லையே’ என்றால் புரிந்தவரிடம் கேட்டுத்தான் படிக்க வேண்டும். வேறு வழி இல்லையா என்றால் இருக்கிறது. அடுத்த பிறவியிலாவது பிறந்தவுடன் தமிழ் கற்றுத் தேறி திருவாசகம் கற்றுக் கடைத்தேறலாம். சிவசிவ.

    முனைவர் நாகப்பன் ஆறுமுகம்
    சிவனருள், கார்த்திகை – மார்கழி,
    திருவள்ளுவர் ஆண்டு 2048,

    இவ்விடம் மறுபதிப்புச் செய்தது தேனீ.

  • Dhilip 2 wrote on 5 பிப்ரவரி, 2018, 22:12

    ஐயோ பாவம் … விட்டா மா இ கா வே தோத்துரும் போல …

  • ஜி. மோகன் - கிள்ளான் wrote on 5 பிப்ரவரி, 2018, 23:19

    தேனீ… அவர்கள் முன் வைத்த கருதுக்கள் யாவும் தமிழராகிய நாம் உணர வேண்டும் என்பது என் கருது.
    (குருவின் படத்தைக் கடவுளுக்கு நிகராக வைத்து வழிபாடு செய்கின்றனர். குரு கேட்ட தொகையைக் கொடுத்துவிட்டு அவர் பெயரைச் சொல்லித் தியானம் செய்தால் நினைத்த காரியங்கள் அனைத்தும் நிறைவேறும் என்ற குருட்டு நம்பிக்கையில் காசுபணம் இழந்து மனநோயாளி ஆகி வாழ்க்கையை இழந்தவர் பலர்}. இது எவ்வளவு உண்மை.
    தேனீ.. அவர்கள் ஒரு சில சமயம் ஆவேசமாக தன் கருதுக்கள் கூறினாலும் அதில் பல உண்மைகள் இருப்பது நாம் அறிவோம். உண்மைகளை பல சுவடுகள் முன் வைக்கும் போது எதிர்ப்புகள் வருவது இயல்பு. அதுவே அது குருவின் படத்தைக் கடவுளுக்கு நிகராக வைத்து வழிபாடு செய்கின்றனர் என்பது. நன்றி தேனி அவர்களுக்கு…..

  • முனிசாமி wrote on 6 பிப்ரவரி, 2018, 9:42

    ஒரு பக்கம் தொன்மையான தமிழ் மொழி அழிந்து விடக்கூடாது என்று உண்மையான நோக்கத்தோடு செயல்பட்டுக் கொண்டிருக்கும் ஒரு கூட்டம். ‘தமிழ்’ மற்றும் ‘தமிழன்’ பெயரைச் சொல்லி பட்டம் பதவி பெற்று வயிறு வளர்க்கும் ஒரு கூட்டம் இன்னொரு புறம்.

    தமிழ் மொழியை அழித்தே தீருவேன் என்ற நோக்கத்தோடு இரவு பகலாக செயல்பட்டுக்கொண்டிருக்கும் கூட்டம் இன்னொரு பக்கம். இதில் தமிழரல்லாத தமிழர்களால் வழிநடத்தப்படும் நம்ம நெடுஞ்சாலை வானொலி முதன்மை நிலை வகிக்கும் வேளை இவர்களை விட நாங்கள் சளைத்தவர்கள் அல்ல எனும் பாணியில் அஸ்ட்ரோ விழுதுகள் அறிவிப்பாளர்கள் தமிழை கடித்து மென்று துப்புகிறார்கள். மாதிரி என்பதை மாரி என்று உச்சரிக்கிறார்கள் இவர்களுக்கு இதை சொல்லிக்கொடுத்த சோமாறி யார் என்பது தெரியவில்லை. ‘காமிக்குவாங்க’ என்பது இவர்கள் புதிதாக கண்டுபிடித்து அவிழ்த்து விட்டிருக்கும் ஒரு தமிழ்ச்சொல். (காமிக்குவாங்க – காட்டுவார்கள்) எல்லாம் வல்ல விழுதுகள் அறிவிப்பாளர்களின் ‘உளறல்களும்’ திணறல்களும் சரியாக இன்னும் எத்தனை காலம் பிடிக்குமோ? இதையெல்லாம் தட்டிக்கேட்க ஆள் இல்லை.
    இவர்கள் இப்படி என்றால் அடுத்து ஒரு கூட்டம் வெள்ளையன் கண்டுபிடிப்பையெல்லாம் தமிழ்ப்படுத்துகிறேன் என்று “அளப்பரிய’ நோக்கத்தோடு கரடு முரடான தமிழ்ச் சொற்களை அறிமுகப்படுத்திக் கொண்டிருக்கிறது. நமக்குத்தான் புதியனவற்றை கண்டுபிடிக்க வக்கில்லை. வெள்ளையனும் அன்னியனும் கண்டுபிடித்தவற்றை அப்படியே உச்சரித்தால் நாம் குறைந்து விடப்போகிறோமா? அல்லது அவனது கண்டுபிடிப்புகளுக்கு தமிழ்ப் பெயரைச் சூட்டினால் நமக்கு பெருமை வந்துவிடப்போகிறதா என்னா…?
    முன்பு ஒருவன் இருந்தான் ‘தாய்’ கட்சியில்..! தமிழுக்கும் தமிழ் பள்ளிகளுக்கும் தன்னால் இயன்றதைச் செய்தான். அவனையும் விரட்டிவிட்டோம். இப்போது உள்ளவனோ இது இந்தியர் கட்சி. தமிழர் கட்சி அல்ல. என்கிறான். ஆரம்பத்தில் தோற்றுவிக்கப்பட்டது தோட்டப்புற தமிழ்னை நம்பித்தான். இதுநாள் வரை வயிறு வளர்த்ததும் அவன் பணத்தில் தான். இன்று பதவி சுகம் காண்பதும் அவன் கொடுத்த பிச்சை தான் என்பதை மறப்பது நல்லதல்லவே.
    இவையெல்லாம் போதாது என்பதற்காக..இங்கே ஒரு கூட்டம் புதிதாக புறப்பட்டிருக்கிறது.
    மதத்தைப் பற்றி விரிவாக எடுத்துச் சொல்வதாக எண்ணிக்கொண்டு ஏற்கனவே குழம்பிக்கிடக்கு குட்டையை மேலும் குழப்புகிறார்கள். நீங்கள் குழப்புவதும் நாங்கள் குழம்பியதும் போதுமடா சாமி. நான் இந்துவாகவும் தமிழனாகவும் பிறந்தேன்..அப்படியே சாக விரும்புகிறேன். என்னால் இயன்ற வகையில் பக்தியைக் காட்டுகிறேன். சாமி கும்பிடுகிறேன். நான் படித்தறிந்த வகையில் ஒரு தமிழனாக வாழ்கிறேன். என் பிள்ளைகளுக்கு நல்ல பாதை காட்ட என் தமிழறிவு எனக்குப் போதும்.
    இனி எவனும் மதத்தைக் கரைத்து குடித்து விட்ட பாணியிலோ தமிழறிவின் கரையைத் தொட்டுவிட்ட பாணியிலோ பேசினால் அல்லது எழுதினால்…..அது நல்லா இருக்காது..

  • தேனீ wrote on 6 பிப்ரவரி, 2018, 13:26

    தங்கள் கருத்துக்கு நன்றி திரு. மோகன்.

    ஐயா திரு. நா. தர்மலிங்கம், ஐயா முனைவர் திரு. நாகப்பன் ஆறுமுகம் போன்றோர் இந்நாட்டில் வாழும் தென் இந்தியருக்குச் சமய கல்வி அவசியமென்பதை வலியுறுத்தி அதற்காக நற்செயலாற்றியும் வருகின்றனர். இதனால் அவர்களுக்குச் சிவபுண்ணியத்தைத் தவிர வேற எந்த இலாபமும் கிடையாது.
    பொதுவாக இந்துக்கள் என்று தங்களை அடையாளப்படுத்திக் கொள்வாரும் தான் சைவர் என்று அறிந்து வாழ்வோரும் நல்வழிபட வேண்டுமென்ற ஒரே ஆதங்கத்தின் காரணமாகவே அவர்தம் செயல் அமைந்துள்ளது. அவர்களைப் புரிந்து கொள்வார் இந்நாட்டில் குறைவு என்பதே வருத்தமளிக்கும் செய்தி.

    ஆனால் பொய்யான மத வழிகாட்டிகளே இன்று நம் மக்களையும் அவர் தம் பணத்தையும் வெற்றிகரமாக கவர்ந்து வருகின்றனர். இதில் சைவ ஆலயங்களும் அதனைச் சார்ந்த ஆலய நிருவாகம் மற்றும் பூசாரிகளும் அடங்கும். அதற்குப் பல இயக்கங்கள் “மதம்” என்ற பெயரை வைத்துக் கொண்டு துணை போகின்றனர். இன்னும் சிலர் மதத்தால் அங்கலாய்த்துக் கொண்டு அழிகின்றனர்.

  • தேனீ wrote on 6 பிப்ரவரி, 2018, 22:37

    #அவர் சம்ஸ்கிருதத்தில் தனக்காக ஓதுவதைக் கேட்டு ஒன்றும் புரியாமல் தலையாட்டிவிட்டு வரும் அவல நிலைக்கு இன்றைய சைவத் தமிழர்கள் ஆட்பட்டிருப்பது குறித்து தமிழர்கள் சிந்திப்பதில்லை.#

    தமிழ் மொழிப் புலமையில் மட்டும் சிறந்து விளங்கிவிட்டு நான் இந்து என்று சொல்லிக் கொள்வதால் பயன் ஒன்றுமில்லை.

    அவர்தம் சமய கல்வியில் சுழியமாக இருந்தாலும் குறையில்லையென்று சப்பைக்கட்டு கட்டுவதற்குக் காரணம் அதைத்தான் காசு கொடுத்துச் சாதித்துக் கொள்ளலாமென்ற மனப்பாங்காகும்.

    அதனாலே சைவ ஆலயங்களில் பூசாரிகளுக்கே புரியாத அயல் மொழியில் வழிபாடு செய்வதையும் நம்மவர் கேள்வி கேட்காமல் ஏற்றுக் கொள்வார்.

    இறை வழிபாடு என்பது நம் உயிர் பக்குவப்பட வேண்டி செய்யப்படும் கிரியையாகும். இது உயிருக்கு உணவாகும். அவ்வாறு நாம் பக்குவப்பட வேண்டுமானால் இறைவனைச் சார்ந்து நிற்க உலகியலைப் படிப்படியாக விட்டு விலக வேண்டும். அதுவே சைவ ஆலயங்களில் நிறுவப்பட்டுள்ள பலிபீடமும் ஆன்மாவாகிய வாகணமும் உணர்த்தும் நெறியாகும்.

    அவ்வாறு பக்குவப்பட வேண்டுமானால் நாம் இறைவனை எப்பொருளில் சிந்தித்து வழிபடுகிறோம் என்பது அவசியம். அப்பொருள் மெய்ப்பொருளைச் சுட்டுகின்றதாவென்ற அறிவு வழிபடுவோருக்கு வேண்டும். இவையெல்லாம் அவரவர் அறிந்த தாய்மொழியில் வழிபாடு செய்வதாலேயே பெறக்கூடும். இதனை அறியாது காசு கொடுத்து அயலார் மொழியில் அருச்சனை செய்யும் ஒரு பூசகரால் அடியார் பெருமக்களுக்கு எவ்வித பக்குவமோ நன்மையோ ஏற்படப்போவதில்லை. விழலுக்கு இறைத்த நீர் போலாகும் புரியாத மொழியில் செய்யப்படும் இத்தகைய இறை வழிபாடு. சிவசிவ.

  • தேனீ wrote on 7 பிப்ரவரி, 2018, 13:36

    நம் வாழ்வில் சைவ நெறி

  • ஜி. மோகன் - கிள்ளான் wrote on 7 பிப்ரவரி, 2018, 20:58

    ஒவ்வொர் முறையும் மந்திரங்கள் ஓதும் போது சுவஹா சுவஹா என்று சொல்கிறார்கள் இதன் உள் அர்தங்கள் என்ன. அதை தமிழில் எப்படி சொல்வார்கள். புரியாத மொழியில் மந்திரங்கள் ஓதும் பொழுது அமாம் சாமி போடும் நாம் அதை ஏன் தமிழில் ஓத சொல்லாமே. இந்த புரியாத மொழியில் மந்திரங்கள் சொல்லும் இவர்கள் ஏன் தன் குடும்பத்திலும் அவர்கள் அந்த மொழியிலேயே உரையாடலாமே. புரியாத மொழியில் மந்திரம் சொல்லி நமக்கு என்ன பயன். (ஒரு மொழியில் எளுதப்பட்டதை அல்லது சொள்ளப்பட்டதை பொருளும் தொனியும் மாறாமல் மற்றொரு மொழியில் வெளிபடுதுவது எவ்வகையில் சரியாக இருக்கும்) தமிழகத்தில் முன்னால் முதலமைச்சர் கலைஞர் கருணாநிதி தமிழில் அர்ச்சனை செய்ய வேண்டும் என ஒரு திட்டம் கொண்டு வந்தார். அது இன்று நடமுறையில் உள்ளதா என்று தெரியவில்லை. நமது நாட்டில் நாம் ஒரு சரியான முடிவு இப்போதே எடுக்க வேண்டும். நமது நாட்டில் இந்து சங்கம் இருப்பது நாம் அறிந்த ஒன்று. அவர்களின் கொள்கை பிடிப்பு என்ன. அவர்கள் தமிழுக்கு இதுவரையில் என்ன செய்து இருகிறார்கள். தமிழுக்கு என்று எதாவது மாநாடோ அல்லது எதாவது செய்து இருக்கிறார்கள. அவர்கள்தான் விளக்கம் சொல்ல வேண்டும். வருடத்திற்கு ஒருமுறையாவது எதாவது செய்யலாமே. அப்படி இருக்கிறதா. இந்த பிராமணர்கள் யார்? தமிழில் பேசும் இவர்கள் தமிழிலேயே அர்ச்சனை பண்ண சொல்ல வேண்டும். நமக்காக ஒரு இயக்கம் தமிழர் புதியதாக மலேசியா நாம் தமிழர் இயக்கம் ஒன்று புதியதாக உருவாகி உள்ளது. வரவேற்போம். இந்து சங்கத்தை பிராமணர் சங்கமாக மாற்றி அவர்கள் வழிநடத்த சொல்வோம். தெலுங்கர், மலையாளி, சீக்கியர் என நம் நாட்டு சகோதரர்கள் மிக சிறப்பாக அவர்களின் சங்கங்கள் மூலமாக சிறப்பான சேவைகள் அமைதியான முறையில் செயல்படும்போது நாம் தமிழர்கள் இந்து சங்கத்தை நம்புவது வேதனையாக உள்ளது. பூனைக்கு யார் மணி கட்டுவது. யோசிப்போம் நாம் தமிழராகிய நாம் இன்றே. நன்றி

  • தேனீ wrote on 7 பிப்ரவரி, 2018, 23:02

    இன்று மலேசிய சைவ கோயில்களில் அருச்சகராக வேலை செய்வோரில் பெரும்பாலோர் (ஏறக்குறைய 90%) தமிழர்களே. இவர்கள் வீட்டில் பேசும் மொழி தமிழ்.

    சமசுகிரத மொழியில் கிரியைகளைச் செய்ய பயிற்சி பெற்றவர் வெகு சிலரே. மற்றவர் சமசுகிரதத்தில் எப்படி சொற்றொடர்களை ஓதி கிரியைகளைச் செய்வது என்பதை அதற்குரிய நூல்களைப் படித்து மனனம் செய்து அப்படியே வாய்பாடாக ஒப்புவிக்கின்றனர். மேலும் இவ்வாறு ஆலயங்களில் அருச்சகராக செய்தொழிலுக்குப் போவோரில் 98% எந்த ஒரு பெரிய படிப்பையும் பெற்றவர் அல்ல. பெரும்பாலோர் அடிப்படைக் கல்வி பெற்று மேற்கொண்டு வேறு நல்ல தொழில் செய்ய வழியில்லாமல் அருச்சகர் தொழிலுக்குப் பணம் சம்பாதிக்க வந்தவரே. ஏதோ ஒரு சிலர் மட்டுமே இயல்பிலேயே இறைத்தொண்டு செய்ய வேண்டுமென்ற நல்லெண்ணத்தில் ஆலய தொண்டிற்கு வந்தவராவார்.

    இத்தகையோர் கோயிலில் நடத்தப்படும் நிருவாக முறைக்கேடுகளைக் கண்டு அத்தொழிலை விட்டு சுயமாக (‘freelance’) கிரியைகள் செய்ய கிளம்பி விடுகின்றனர். ஆக இன்றைய நிலைப்படி, ஒரு சில பெரிய ஆலயங்களைத் தவிர்த்து மற்ற ஆலயங்களில் வழிபாட்டுக் கிரியைகளை நடத்தும் பூசாரிகளில் அவற்றைப் பழக்கத்தால் கற்றுக் கொண்டு செய்கின்றனர். அதனால் அவர்தம் சமசுகிரதமும் தமிழும் கலந்த உச்சரிப்பில் மெய்சிலிர்த்து போக வேண்டாம் காரணம் அவர் உச்சரிக்கும் சொற்றொடர்களுக்கு அவர்களுக்கே முறையாக விளக்கம் சொல்லத் தெரியாது. இதுதான் பல சைவ ஆலயங்களின் இன்றைய நிலை. இவர்களுக்குக் கொடுக்கப்படும் ஊதியத்தை வெளியே சொன்னால் வெட்கக்கேடு. அதைச் சொல்ல இந்த அருச்சகர்களே வெட்கப்படுவார். அப்புறம் ஆலயத்தில் நடத்தப்படும் இத்தகைய இறை வழிபாட்டால் ஆன்ம ஈடேற்றம் எப்படி ஏற்படும்? அதனால்தான் இன்று இந்நாட்டில் வாழும் தென் இந்தியரில் பெரும்பாலோர் இறை வழிபாட்டின் மகத்துவத்தை அறிய முடியாமல் போகின்றது. கோயில் அருச்சகரில் பெரும்பாலோர் நமக்கு குருக்களாக விளங்க தகுதியற்றோராக உள்ளனர் என்பதே உண்மை.

  • தமிழ்வாணன் wrote on 12 பிப்ரவரி, 2018, 17:05

    இந்து சங்கத்தில் 90% தமிழர்கள் என்றால் நீங்கள் யார் மலேசிய தமிழர்களின் தலைவர் என்று கையொப்பமிட ? -மலேசிய நாம் தமிழர் இயக்கம் டத்தோ மோகன் சான் மீது பாய்ச்சல் .

    14 ஆம் தேதி 4-காம் மாதம் , இந்தியர் விழா அல்லது இந்து விழா என்ற அடிப்படையில் பிரதமரிடம் பொது விடுமுறை கோரும் முயற்சியில் மலேசிய இந்து சங்க தலைவர் டத்தோ மோகன் சான் , இறங்கிருப்பது , அவர் பிரதமர் துறையில் வழங்கிய மனு நகலின் வழி தெரிய வருகிறது என்றார் மலேசிய நாம் தமிழர் இயக்கத்தின் செயலவை உறுப்பினரும் , சிலாங்கூர் மாநில இளைஞர் பாசறை பொறுப்பாளருமான மு. தமிழ்வாணன் . இந்த முயற்சியை எடுத்ததில் நாங்கள் எதிர்க்கவில்லை , மாறாக மலேசிய இந்து சங்க தலைவர் டத்தோ மோகன் சான் தன்னை தமிழர்களின் தலைவர் என்று அடையாளப்படுத்தி , அந்த கோரிக்கை மனுவில் கையொப்பமிட்டதைதான் எதிர்க்கிறோம் என்றார் தமிழ்வாணன் . அக்கடிதத்தில் மலேசிய சீக்கியர் , வங்காளியர் , குசராத்தியர் , தெலுங்கர் , மலையாளி, மாராட்டியர் போன்றோர்களின் இயக்க கையொப்பத்தை பெற்ற டத்தோ மோகன் சானுக்கு , தமிழர் இயக்கங்களை கண்ணுக்கு தெரியவில்லையா என்று வினவினார் . மலேசிய நாம் தமிழர் இயக்கம் , இதை எதிர்ப்பது இரண்டு காரணங்களுக்காக, அதாவது ,மலேசிய இந்து சங்கத் தலைவர் டத்தோ மோகன் சான் தமிழரே அல்ல , இது அவர் பேசிய நேர்காணலின் கோணோளியை மலேசிய நாம் தமிழர் இயக்கம் அம்பலபடுத்தியதிலிருந்து உணரலாம் .ஆகையினால் , தமிழர் பூர்வீக இல்லாத ஒருவர் தன்னை தமிழர் என்று கூறிக்கொண்டு கையொப்பமிட்டது ஒரு ஏமாற்று வேலையே என்று சாடினார் . இரண்டாவது , ஒரு வேலை மலேசிய இந்து சங்கத்தின் தலைவர் , ஒரு தமிழராக இருந்தாலும் , கூட மலேசிய இந்து சங்கம் மலேசிய தமிழர்களை பிரதிநிதிக்க முடியாது , தகுதியும் இல்லை , மலேசிய இந்து சங்கம் , இந்து மதத்தை மட்டுமே பிரதிநிதிக்க முடியும் என்று விளக்கமளித்தார் தமிழ்வாணன் . மலேசிய இந்து சங்கம் , இந்து மதத்தை தழுவியிருக்கும் பல்வேறு இனங்களை கொண்டவையாகும் , அப்படியிருக்கையில் தமிழர் என்ற தேசிய இனத்தை பற்றி இவருக்கு என்ன தெரியும் என்றார் . தமிழர்களின் பண்டிகை என்னவென்று தெரியுமா ? தமிழர்களின் மறை என்னவென்று தெரியுமா ? தமிழர்களின் இலக்கன இலக்கியங்கள் தெரியுமா ? இப்படி தொடர்ந்து கேள்விகளை எழுப்பி கொண்டே போகலாம் என்றார் தமிழ்வாணன்.

    இந்த சர்சைக்கு பிறகு அனைவரிடமும் எழும் கேள்விகள் என்னவென்றால் , யார் தமிழரின் தலைவர் என்பது ? , நாங்கள் என்ன சொல்ல விரும்புகிறோம் என்றால் , யார் தமிழர்களின் தலைவர் என்பதை விட , தமிழர் தேசிய சிந்தனையில் உள்ள பல தமிழர் இயக்கங்கள் இங்கு சிறப்பாக இயங்கி கொண்டு வருவது , இக்கேள்விகளை கேட்பவர்களுக்கும் சரி, அல்ல டத்தோ மோகன் சானுக்கும் தெரியாதா ?

    இந்நாட்டில் தமிழர்களுக்காக பல போரட்டம் , இன மீட்சி மொழி மீட்சி பணியில் களமாடிய பல தமிழர் இயக்கங்கள் உள்ளன, உதாரணத்திற்கு மறைந்த தமிழறிஞர் ரா.நா.வீரப்பனார் தலைமையில் இயங்கிய உலக தமிழர் பண்பாட்டு இயக்கம் , மறைந்த மூதறிஞர் மு . மணிவெள்ளையனார் தலைமையிலான மலேசிய தமிழ் இலக்கிய கழகம் , மறைந்த தமிழ் நெறி அறிஞர் அ.பு . திருமாளனார் தலைமையிலான மலேசிய தமிழ் நெறி கழகம் , தற்போது இயங்கி கொண்டிருக்கும் , மலேசிய தமிழ் நெறி வாழ்வியல் இயக்கம் , பேராக்கில் தமிழர்களுக்கு என்று தமிழ்க்கோட்டம் உருவாக்கிய தமிழ் வாழ்வியல் இயக்கம் (ஐயா திரு முருகையன் தலைமையில்) , மூலப்பெருந்தமிழ் அறிஞர் ஐயா திருசெல்வனார் தலைமையிலான தமிழியல் ஆய்வுக்களம் , 2012 ஆம் , ஆண்டு ஐயாயிரம் தமிழர்களை ஒருங்கிணைத்து உலக தமிழர் பாதுகாப்பு மாநாடு செய்த உலக தமிழர் பாதுகாப்பு செயலகம் , மலேசிய தமிழர் சங்கம் , தமிழர் குரல் , தமிழர் தேசிய இயக்கம் , தமிழ் காப்பகம் மற்றும் மலேசிய தமிழர்களின் ஆதவிலும் தமிழ் அறிஞர்கள் ஆசியில் பல போராட்டங்களை முன்னெடுத்து வரும் மலேசிய நாம் தமிழர் இயக்கம் , இன்னும் பல தமிழர் சார்ந்த இயக்கங்கள் தமிழர் தமிழியல் சிந்தனையோடு இயங்கி வருகிறது , என்று மலேசிய நாம் தமிழர் இயக்க செயலவை உறுப்பினர் மு.தமிழ்வாணன் பதிலடி கொடுத்தார் . மேலும் இது போன்ற இனமறைப்பு , உருமறைப்பு செய்பவர்கள் யாராக இருந்தாலும் , மலேசிய நாம் தமிழர் இயக்கம் தொடர்ந்து எதிர்ப்போம் .

    தமிழர்களை தலைமையேற்க்க வழிநடத்த தமிழ் பிள்ளைகள் நாங்கள் இருக்கிறோம் , தேவையில்லாமல் இது போன்று மூக்கை நுழைப்பதை மலேசிய இந்து சங்க தலைவர் டத்தோ மோகன் சான் நிறுத்திக்கொள்ள வேண்டும் . இந்நாட்டில் தமிழர்கள் , தெலுங்கர்கள் , மலையாளிகள் தமிழ்மொழி குடும்ப அடிப்படையில் ஒற்றுமையாக இருக்கின்றனர் அதை மோகன் சான் போன்றோர்கள. அதை கெடுக்க முயற்ச்சிப்பது , தெளிவாக தெரிய வருகிறது என்றார் தமிழ்வாணன். 90% விழுக்காடு இந்து சங்கத்தில் தமிழர்களை பிரதிநிதித்தேன் என்று அசிங்கமாக மார்தட்டிக் கொள்ளும் டத்தோ மோகன் சான் , தமிழர் திருக்கோயில்களில் தமிழில் மந்திரங்கள் ஓதுவதற்கு வழி செய்தாரா ,அதிகாரத்திற்கு தமிழர்களை ஊறுக்காய் போடும் டத்தோ மோகன் சான் செயல் தெளிவாக வந்துள்ளது என்றார் . தமிழர்களாகிய எங்களுக்கும் சரி யாராக வேண்டுமானலும் , “தகப்பன் என்பவன் என்னை பெற்றவனாக இருக்க வேண்டும் , தலைவன் என்பவன் என் ரத்தவனாக இருக்க வேண்டும்” இதுதான் எங்கள் நிலைப்பாடு .

கருத்துகளை தமிழில் தட்டச்சு செய்ய முடியும். உதாரணம் : "amma" என்று டைப் செய்து SPACEBAR-ஐ அழுத்தினால் "அம்மா" என்று தோன்றும் (Press Ctrl+g to toggle between English and Tamil)

%d bloggers like this: